ATUL N. CHOTAI

a Writer

ગણપતી બાપાના વાહન એવા ઉંદરો પરીવારના સભ્યોની જેમ સાથે રહે છે

Umeshbhai Ramani

Umeshbhai Ramani

દરેક મંગલ કાર્યમાં જેનું સર્વ પ્રથમ પૂજન થાય છે તેવા વિઘ્નહર્તા દેવ ગણપતિ બાપાની ભકિત ગણેશોત્સવ સમયે બધા કરતા હોય છે પણ અહીં આપણે વાત કરવી છે ગણપતિ બાપાના વાહન એટલે કે મૂષકની.. સામાન્ય રીતે માણસને કૂતરાં, બિલાડા, પોપટ, ગાય, મોર કે કાચબા સાથે દોસ્તી કે આત્મીયતા થઇ જતી હોય છે પણ નટખટ મૂષકની માણસની સાથે દોસ્તી થાય અને મૂષકો પાછા માણસો સાથે જ ઘરમાં પરિવારના સભ્યોની જેમ રહે એ વળી કેવું..? અને એ પણ એક સાથે ૮૦ સફેદ ઉંદરો ની સાથે..!!

રાજકોટના સંત કબીર રોડ પર રહેતા અને બંગડીનું જોબવર્ક કરતા ઉમેશભાઇ રામાણીના ઘરે ૮૦ જેટલા સફેદ ઉંદર છે અને મૂષકરાજ સાથે એમને એવી દોસ્તી થઇ ગઇ છે કે મૂષકો રીતસર ઉમેશભાઇના શરીર પર આળોટે છે અને ઉમેશભાઇ પણ મૂષકોને સંતાનની જેમ સાચવે છે મજૂરી કામ કરતા ઉમેશભાઇ કહે છે કે ચારેક વર્ષ પહેલા ગણેશોત્સવ દરમિયાન બે જોડ સફેદ મૂષકોની લાવ્યો હતો પછી ઉત્સવ બાદ તેને રસ્તા પર છોડતા જીવ ન ચાલ્યો અને ઘરે પિંજરુ રાખ્યું ધીમે ધીમે દર ત્રણ ચાર મહિને મુષકોની જોડ છ થી સાત બચ્ચાને જન્મ આપતી ગઇ અને તેમની વસ્તી વધતી ગઇ ક્યારેક અમુક ઉંદર મોતને પણ ભેટ્યા છે. એક સમયે ઉંદરોનો વંશવેલો ૧૨૫ સુધી પહોચ્યો હતો પણ આજે ૮૦ જેટલા મૂષકો મારા ઘરમાં મારી સાથે રહે છે

મારા ઘરને મારા મીત્રો અને સંબંધીઓ રેટ હાઉસથી વધુ ઓળખે છે ઉમેશભાઇ કહે છે કે દર મહિને ઉંદરો પાછળ હું એક હજાર જેટલો ખર્ચ કરું છું ઉંદરોને કાજુ, બદામ, દૂધ, આઇસ્ક્રીમનો ખોરાક આપવામાં આવે છે. મારા ઘરના નવેળામાં ઉંદરો માટેનો એક અલગ વિભાગ જ કરવામાં આવ્યો છે જેમાં અલગ – અલગ પિંજરા રાખવામાં આવ્યાં છે સફેદ ઉંદરો ઘરમાં છૂટથી હરી ફરી શકે છે તેઓ ક્યાંય ભાગી જતા નથી તે ફળીયામાં ફરતા હોય છે અને  ફરી સમય થાય એટલે નવેળામાં પાછા આવી જાય છે. ગણપતી ઉત્સવ વખતે જે લોકોને ઉંદરો જોઇતા હોય તેને ઉમેશભાઈ ઉત્સવ પૂરતા વિનામૂલ્યે ઉંદર આપે છે જે ઉંદરો આરતીમાં અને પંડાલમાં આટાફેરા કરે છે જેથી લોકોમા એક નવું આકર્ષણ ઉભુું થાય છે તો ચાલો આપણે પણ  ઉમેશભાઈ ની અને ઉંદરો ની દોસ્તી ને સલામ કરીએ..

Advertisements

Comments are closed.