ATUL N. CHOTAI

a writer – since 2014


ક્યારેક આકરા શબ્દો પણ કોઇની જિંદગીમાં સુખદ વળાંક લાવી દેતા હોય છે..

– આશુ પટેલ

એક છોકરાનું શરીર માયકાંગલું હતું. તેના સુકલકડી દેહની બીજા છોકરાઓ મજાક ઉડાવતા. તે સ્કૂલમાં જતો તો ત્યાં તેના સહાધ્યાયી છોકરાઓ પણ તેની મશ્કરી કરતા અને ઘણા તોફાની છોકરાઓ તેને મારતા કે ધક્કો મારીને પાડી દેતા. તે છોકરો ચૂપચાપ બધાનો માર ખાઇ લેતો. માર સહન ન થાય ત્યારે તે રડી પડતો. તેને રડતો જોઇને તોફાની છોકરાઓ તેની ઓર મજાક ઉડાવતા. તે છોકરો હંમેશાં ડરેલો જ રહેતો. તેને મારનારા છોકરાઓ વિરુદ્ધ ફરિયાદ કરતા પણ તેને ડર લાગતો. તેને એવું લાગતું હતું કે તે ફરિયાદ કરશે તો તોફાની છોકરાઓ તેને વધુ મારશે. એવું માનવા માટે તેની પાસે કારણ હતું. એક વાર તેના સહાધ્યાયીઓએ તેને ફટકાર્યો ત્યારે તેણે કહ્યું હતું કે હું આપણા શિક્ષકને તમારા વિશે ફરિયાદ કરીશ. એ વખતે તેના સહાધ્યાયીઓએ તેને વધુ માર્યો હતો અને કહ્યું હતું કે શિક્ષક પાસે ફરિયાદ કરવા ગયો તો તારી ખેર નથી.

એક દિવસ તો તેને એટલો માર પડ્યો કે તેની સહનશક્તિની હદ આવી ગઇ. તે રડતો રડતો તેના પિતા પાસે ગયો. તેણે ફરિયાદ કરી કે બધા છોકરાઓ મને રોજ મારે છે. એ વખતે તે કિશોરાવસ્થામાં હતો. તેની ફરિયાદ સાંભળીને તેના પિતાએ તેને લાફો ઝીંકી દીધો. છોકરો તો હેબતાઇ ગયો પરંતુ લાફો ઝીંકી દીધા પછી તેના પિતાએ કહ્યું બીજા છોકરાઓ તને મારે છે તો તારી પાસે હાથ નથી આજ પછી કોઇએ તને માર્યો છે એવી ખબર પડશે તો હું તારી ધુલાઇ કરી નાખીશ

પિતાના એ શબ્દોએ ચમત્કાર કર્યો. તે છોકરો નિયમિત કસરત કરવા લાગ્યો. તેણે પોતાનું શરીર મજબૂત બનાવ્યું. તેને કોઇ મારવા આવે તો પહેલો ઘા તે કરી લેવા માંડ્યો. હવે બધા છોકરાઓ તેનાથી ડરવા લાગ્યા. તે છોકરાએ તેનું શરીર એવું બનાવી દીધું કે તે કુસ્તી લડવા લાગ્યો. તે કુસ્તીની સ્પર્ધાઓ જીતવા માંડ્યો અને ૨૯ વર્ષની ઉંમરે તે કુસ્તીમાં વર્લ્ડ ચેમ્પિયન બની ગયો આ વાત વિશ્વ વિજેતા કુસ્તી ચેમ્પિયન એમિલ ચાયાની છે, જે કિંગકોંગ નામથી જગમશહૂર બન્યો હતો. ક્યારેક કોઇના આકરા શબ્દો પણ માણસનું જીવન સુખદ રીતે બદલાવી નાખતા હોય છે. (મુંબઈ સમાચાર માંથી સાભાર)

Advertisements