ATUL N. CHOTAI

a writer – since 2014


સોશ્યલ મિડીયાએ સીમાડા તોડી નાખ્યા…

mitesh ahir

mitesh ahir

– મિતેષ પી. આહીર
મો : ૯૭૨૫૦ ૫૫૨૯૯
રાજકોટ

સોશ્યલ મિડીયાએ તમામ સીમાડા તોડી નાખ્યા..!! મતલબ કે જેને જે જોઇએ છે તે બધુ જ સોશ્યલ મિડીયા પીરસે છે. આવડત હોય તેને બધી તક સોશ્યલ મિડીયા આપે છે. માની લ્યો કે તમે કવિ છો.. તો તમારા તમામ સર્જનને વિશાળ લોક સમુદાય સુધી પહોચાડવા સરસ માધ્યમ બની રહે છે આ સોશ્યલ મિડીયા.. એક સમયે કવિ કવિતાનું સર્જન તો કરી લેતા પણ પછી વ્યકત કરવા ઘણા ફાફા મારવા પડતા. નામી કવિની કવિતા તો મેગેઝીનોમા છપાય પણ નવોદીત કે ઉગતા કવિએ કોઇને પકડી પકડીને પાસે બેસાડી કવિતાઓ સંભળાવવી પડતી. પણ સોશ્યલ મિડીયા આવતા આવી ગરજ સાવ મટી ગઇ. ફેસબુક, ટવીટર, ઇન્સ્ટાગ્રામ કે વોટ્સ અેપ ઉપર તમારી કવિતા ચડાવી દયો એટલે વાત પુરી. થોડી જ વારમાં કયાનો કયાં વાયરલ થઇને વિશાળ સમુદાય સુધી પહોંચી જાય.

આજ ગણિત લેખક અને ચિત્રકારને પણ લાગુ પડે છે. તેમના સરસ લેખ કે સરસ ચિત્રને વિશાળ સમુદાય સુધી પહોંચાડવા સોશ્યલ મિડીયા હાથવગુ હથીયાર બની રહે. પ્રિન્ટ મિડીયા પાસે છપાવવા જવાની જરૂર જ શું રહી..?? અરે હવે તો ઉલ્ટુ થવા લાગ્યુ છે. સોશ્યલ મિડીયામાં તમે કાઇક જોરદાર મુકો તો પ્રિન્ટ મિડીયા સામેથી તેને સાભાર લખીને ઉઠાવી લે છે. પણ તમારૂં કન્ટેઇન દમ વાળુ હોય તે પહેલી શરત બની રહે છે. મતલબ સારો ઉપયોગ થાય તો સોશ્યલ મિડીયા સદાબહાર છે. ઘરે બેઠા ગંગાજી.. જે કઇ એકટીવીટી કરવી હોય તે અેઇને પગ ઉપર પગ ચડાવીને ઘરે બેઠા બેઠા કે તમારી ઓફીસમાં બેઠા બેઠા કર્યે રાખો..

લેખ, કવિતા કે ચિત્ર જ નહી ગાયન, નૃત્ય જેવી તમારી કોઇપણ કાબેલીયતને તમે આ રીતે વિશાળ વર્ગ સામે મુકી શકો. વ્યવસાયીક જાહેરાત પણ તમે સાવ મફત પ્રસરાવી શકો. સરસ મજાની કલરફુલ ટકાટક જાહેરાત તૈયાર કરીને ફેસબુક કે વોટ્સએપ પર ફરતી કરી દયો એટલે કયાંનો કયાં પહોચી જશે. તમને ગાવાનો શોખ છે, તો મંડો ગાવા ને જોકસ કે લોકસાહિત્યનો શોખ છે તો મંડો એવુ બધુ તૈયાર કરવા ને સોશ્યલ મિડીયાને અર્પણ કરી દયો.. બસ તમારે કયાંય સ્ટેજ શોધવા જવાની જરૂર નથી. સ્ટેજ તમને શોધતું આવશે.

બોલો.. હવે તમે જ કહો..?? સોશ્યલ મિડીયાએ બધાય સીમાડા તોડી નાખ્યા કે નહીં..?? હું મોટો લેખક કે હું મોટો કવિ કે સર્જક તેવો ભલભલાનો વહેમ પણ આ સોશ્યલ મિડીયાએ ભાંગીને ભુકકો કરી નાખ્યો. ગમે તે લોકો ગમે તેવું આવડયુ તેવું તૈયાર કરીને વાયરલ કરી રહ્યા છે અને આશ્ચર્યની વાત કે ઘણીવાર એવુય બને કે સાવ સામાન્ય લાગતી વ્યકિતનું કન્ટેઇન કલ્પના બહારની પ્રસિધ્ધી મેળવી લ્યે છે. એવુય બનતુ જોવા મળે કે કોપી પેસ્ટવાળા મુળ સર્જક કરતા વધુ ફાયદો ઉઠાવી જાય. એટલે તો મે પહેલા જ કહી દીધુને..?? કે અહીં બધાય સીમાડા તુટી ગયા છે.

એક જમા પાસુ એવુય છે કે કોઇને કયાય અન્યાય થયો હોય ત્યારે સોશ્યલ મિડીયા સધીયારાની ભુમિકા અદા કરી બનતો ન્યાય અપાવવા સબળ માધ્યમ બની રહે છે. ગુમ કે જુદા પડી ગયેલાઓને ભેગા પણ કરાવી દયે છે. સદ્ઉપયોગ છે તેમ દુરઉપયોગ પણ છે. કોઇને ઉતારી પાડવા માટે પણ આ માધ્યમનો એટલો જ ઉપયોગ થાય છે. એ જરા ખુંચે એવી દુઃખદ બાબત છે. પણ આવા લોકોની ખંધાય જાજો સમય ટકી શકતી નથી. અસલીયત સામે આવી જ જાય છે. એમ તો આવા દુષણને ડામવા પોલીસ ખાતાનો સાયબર વિભાગ પણ સાબદો જ હોય છે. એમ ન માનવું કે તમારી એકટીવીટી કોઇ જોતુ નથી. સાયબર પોલીસની આંખ સતત વોચમા જ હોય છે. જયાં સુધી કોઇ ફરીયાદ ન કરે ત્યાં સુધી એ બધુ જોયા જ કરે છે. પણ જેવી કોઇની ફરીયાદ મળે કે તુરંત સાયબર પોલીસ હરકતમા આવી જાય છે. કઇ વાંધાજનક વસ્તુ કોણે અપલોડ કરી, કયારે કરી, કોણે કોણે તેને વાયરલ કરી તે બધી જ માહીતી શોધી કાઢી પગલા ભરે છે.

કોણ સોશ્યલ મિડીયાનો કેવો ઉપયોગ કરે છે ઇ વાત જવા દઇએ પણ એ તો સ્વીકાવુ જ રહે કે સોશ્યલ મિડીયા એક જરૂરીયાત બનતુ જાય છે. સોશ્યલ મિડીયાની હું કોઇ તરફદારી નથી કરતો પણ એટલુ ચોકકસ કહીશ કે સમજીને મર્યાદામાં રહીને ઉપયોગ કરાય તો સોશ્યલ મિડીયા સારૂ જ છે. ઘણાય એમ કહેતા ફરતા હોય છે કે ફેસબુક, વોટસ અેપ વગેરે ફાલતુ છે, દુષણ છે એટલે તેનાથી દુર રહેવાય.. તો ના હુ એ સ્વીકારવા તૈયાર નથી. કેટલીક મર્યાદા જરૂરી છે પણ સાવ બંધ કરવા જેવુ તો નહીં જ.. આ તો એના જેવી વાત થઇ કે તમારે એક ગામથી બીજા ગામ જાવુ હોય ને તમને કોઇ સલાહ આપે કે ભાઇ વાહનમાં ન જવાય, એમાં અકસ્માત થાય. બળદ ગાડામા જ જવાય.. તો આજના સમય પ્રમાણે તમને એ વાત કેવી હાસ્યાસ્પદ લાગશે..?? તો બસ એવું જ સોશ્યલ મિડીયા ન વાપરવાની સલાહ બાબતનું છે. સોશ્યલ મિડીયા તો આજની જરૂરીયાત છે છે ને છે જ. વાહનનો ઉપયોગ તો કરવાનો જ હોય, અકસ્માત ન થાય તેની સાવધાની પણ રાખવી રહે. બસ આજ ગણિત સોશ્યલ મિડીયાને લાગુ પડે. થોડી ઘણી મર્યાદાઓ સમજીને આ માધ્યમને ઘમરોળો તો કાંઇ ખોટુ નથી.. અસ્તુ..


દેશપ્રેમની આપણી ભાવનાને હવે જગાડવી પડશે..

૧૫ ઓગષ્ટ અને ૨૬ જાન્યુઆરી જેવા ઘણા રાષ્ટ્રીય પર્વોમાંથી આપણી દેશપ્રેમની ભાવના ધીરે ધીરે ગાયબ થતી જાય છે. આજે આપણે ક્રિકેટ મેચ, ફિલ્મો અને તહેવારોમાં જેવો ઉત્સાહ દેખાડીએ છીએ તેવો ઉત્સાહ આપણા રાષ્ટ્રીય પર્વો ઉપર નથી દેખાડતા. આ એક સત્ય અને કડવી હકીકત છે તથા આપણી કમનસીબી પણ છે. આપણી પાસે મોબાઈલમાં બિનજરૂરી વાતો કરવા, ફેસબુક, વોટ્સઅપ જેવા સોશ્યલ મીડિયા માટે સમય હોય પણ દેશસેવાના કામ માટે કે આપણા રાષ્ટ્રીય પર્વો માટે જો આપણી પાસે સમય ના હોય કે રસ ના હોય કે તે બાબત આપણી માટે ખેદજનક પણ છે.

આપણા દેશનો ઇતિહાસ ખુમારી અને શહિદીઓથી ભરેલો છે. આપણી ભારત માતાની રક્ષા તથા દેશને આઝાદ કરાવવા માટે આપણા લીલાછમ માથાઓ વધેરાઈ ગયા અને ઘણા લોકોએ પોતાની નોકરી, વ્યવસાય, ધિકતી કમાણી અને પરિવાર છોડીને પોતાની જાતને દેશ માટે કુરબાન કરી દીધી અને એટલે જ આ આઝાદીનો અનુભવ આપણે સહુ કરી રહયા છીએ પણ જયારે આ અમુલ્ય આઝાદીનું જતન ના થાય અને આપણામાં રાષ્ટ્રપ્રેમનો અભાવ જોવા મળે ત્યારે આપણા માટે કુરબાન થયેલા આપણા દેશ શહીદોનું આ અપમાન થતું હોય તેમ નથી લાગતું..?? શું આ બધા વિરલાઓ તેના પરિવાર માટે વધારાના હતા..?? આજે આપણી પેઢીને આઝાદી તૈયાર ભાણે મળી ગઈ છે એટલા માટે તે આઝાદીની આપણને કદર નથી કરતા પણ ગુલામી, પરતંત્રતાની તકલીફ શું હોય..?? તેની આપણને કોઈને ખબર જ નથી. ફક્ત વિદેશમાં ભણવું, ડોલર – પાઉન્ડ કમાવા અને ત્યાં જ સેટલ થઇ જવું. દેશનું થવું હોય તે થાય પણ આપણું સારું થવું જોઈએ એવી આપણી વિચારસરણી ને હવે બદલવાની જરૂર છે.

આજે આપણે આઝાદીની સાચી કિંમત સમજતા નથી અને ધર્મ, રાજકારણ, જ્ઞાતિ – જાતિના નામે લડાઈ, ઝઘડા, આંદોલન કરી દેશને નુકશાન કરીએ છીએ. આપણી આવકમાંથી સરકારને પ્રમાણકતાથી ટેક્સ ભરી દેશની પ્રગતિમાં હિસ્સો આપવાને બદલે આપણે ટેક્સ ચોરી કરીએ છીએ, સરકારના લાભો ખોટી રીતે મેળવવા આપણે ઘણા કાવા દાવા પણ કરીએ છીએ, મોબાઈલ, ટીવી, ઇન્ટરનેટ જેવી ટેક્નોલોજીનો આપણે કેવો ઉપયોગ કરીએ છીએ..?? અને આપણે શું છીએ..?? આપણી ફરજો શું છે..?? તે જોવાને બદલે આપણે સરકારને અને બીજા લોકોને પણ તેની ફરજો સમજાવીએ છીએ..?? અને આવું બધું કરવા માટે જ આપણને આઝાદી મળી છે બરોબરને..??

આજે આપણો દેશ આંતરિક અને બાહ્ય જેવી ઘણી સમસ્યાઓથી પરેશાન છે તેવા સમયે આપણે દેશ માટે અને તેની પ્રગતિ અને વિકાસ થાય તે માટે વિચારવું જોઈએ. આપણા સમાજને રાષ્ટ્રપ્રેમને લગતું શિક્ષણ આપવાની જરૂરીયાત આજે વર્તાઈ રહી છે. આજે જો મહાત્મા ગાંધી સહિત આપણા વીર સપૂતોએ આપણા દેશ માટે વિચાર્યું ના હોત કે સમય ના આપ્યો હોત તો આપણી અત્યારે શું હાલત હોત..?? જો આપણી પાસે જ દેશ માટે સમય નહિ હોય તો બીજાને ને તો ક્યાંથી હોય..?? તો જયારે દેશ મુશ્કેલીમાં આવશે ત્યારે આપણને કોણ બચાવશે..?? તેવું વિચારી દેશના વિકાસને લગતી બાબતોમાં આપણે તન – મન – ધનથી લાગી જવું જોઈએ.

તો ચાલો હવે આપણે સહુ જાગ્યા ત્યારથી સવાર સમજીને જાહેરમાં જેટલી બહાદુરી દેખાડીએ છીએ તેટલી જ બહાદુરી આપણા દેશ માટે દેખાડી અને આ દેશના તમામ લોકોને આપણા પરિવારજનો સમજી અંદરો અંદર ઝઘડવાનું બંધ કરીએ તથા આપણા દેશ માટે માત્ર બોલીને જ નહિ પરંતુ સાચા અર્થમાં સમય અને શક્ય બને તેટલું યોગદાન આપીને આપણી અમુલ્ય આઝાદીનું સાચા અર્થમાં સન્માન કરીએ.. ૭૨ માં સ્વાતંત્રય પર્વની આપ સહુને ખુબ ખુબ શુભેચ્છાઓ…

જયહિન્દ..

અતુલ એન. ચોટાઈ
પત્રકાર અને લેખક
રાજકોટ – ગુજરાત


બરડા ડુંગર વિષેની માહિતી આપતી નિઃશુલ્ક ઈ-બુક

વહાલાં વાચકમિત્રો

પોરબંદર પાસે આવેલા બરડા ડુંગર વિષેની માહિતી આપતી એક નાની ઈ -બુક મેં સંકલીત કરી છે. જે તમારા સહુના વાંચન અને રેફરન્સ માટે છે જેને નીચેની લિન્ક દ્વારા નિઃશુલ્ક ડાઉન લોડ કરી શકાશે… આ બુક આપ સહુને જરૂર ઉપયોગી થશે એવી અપેક્ષા સહ…

Bardo Dunger E – Book By Atul Chotai

આપનો સહદયી

-અતુલ એન. ચોટાઈ
(પત્રકાર અને લેખક)
રાજકોટ – ગુજરાત

પોરબંદર બરડા ડુંગર ઈ -બુક નિઃશુલ્ક ડાઉનલોડ અતુલ એન. ચોટાઈ (પત્રકાર અને લેખક) રાજકોટ – ગુજરાત બરડો ડુંગર અતુલ ચોટાઈ