ATUL N. CHOTAI

a writer – since 2014


સૌરાષ્ટ્ર-કચ્છનાં ગંભીર રોગના દર્દીઓના ઇલાજ માટે રાજકોટ ખાતે કાર્યરત બનેલ સુપર સ્પેશ્યાલિટી હોસ્પિટલ..

civil hospital rajkot.

civil hospital rajkot.

આલેખન : રાધિકા વ્યાસ
(માહિતી બ્યુરો – રાજકોટ)

હેલ્થ ઇઝ વેલ્થ આ ઉક્તિ ખૂબ જ પ્રચલિત છે. આપણી પાસે બધું ભૌતિક સુખ હોય પણ તંદુરસ્તી ન હોય તો બધું જ નકામું છે. માણસ પ્રથમ સંપત્તિ માટે તંદુરસ્તીનો ભોગ આપે છે અને પછી સ્વાસ્થ્ય માટે સંપત્તિ ખર્ચે છે, પરંતુ જો તંદુરસ્તીની દરકાર પહેલેથી જ કરવામાં આવે તો બીમારીઓથી બચી શકાય છે. તેમ છતાં માણસ પર જ્યારે મહારોગ ત્રાટકે ત્યારે તે કોઈ અસરકારક સારવારની સાથે ખિસ્સાને પરવડે તેવી હોસ્પિટલની શોધમાં હોય છે. રાજકોટવાસીઓની આ શોધનો અંત આવે છે, સિવિલ હોસ્પિટલ એટલે પીડીયુ હોસ્પિટલે. કારણ કે, અહીં દર્દીઓના દર્દને મળે છે આધુનિક સુવિધાઓ સાથે શ્રેષ્ઠ સારવાર.

જન આરોગ્ય પ્રત્યે સતત જાગૃત અને સંવેદનશીલ સરકાર લોકોને કિફાયતી અને ઝડપી આરોગ્ય સુવિધા સુલભ થાય તે માટે વિવિધ યોજના હેઠળ રાજ્યના દરેક લોકોની તંદુરસ્તી જાળવવાના પ્રયાસો કરતી રહે છે. પ્રધાનમંત્રી સ્વાસ્થ્ય સુરક્ષા યોજનાના ભાગરૂપે રાજકોટ ખાતે રૂા. ૧૫૦ કરોડના ખર્ચે બનેલી સ્ટેટ ઓફ આર્ટ સુપર સ્પેશ્યાલિટી હોસ્પિટલ અદ્યતન સુવિધા સાથે લોકોના આરોગ્યની સુખાકારી જાળવવા નિર્માણ પામી છે. મુખ્યમંત્રીશ્રી વિજયભાઈ રૂપાણી, તેમજ કેન્દ્રના આરોગ્ય અને પરિવાર કલ્યાણ મંત્રીશ્રી ડૉ. હર્ષવર્ધન અને નાયબ મુખ્યમંત્રીશ્રી નીતિનભાઇ પટેલના વરદ હસ્તે આ હોસ્પિટલનું લોકાર્પણ કરવામાં આવ્યું છે. આ નવનિર્મિત હોસ્પિટલમાં એ,બી,સી,ડી મુજબ ચાર વિભાગો છે. જેમાં દરેક માળે ઓ.પી.ડી., મેડિકલ સ્ટુડન્ટ્સ માટે એજ્યુકેશન પર્પસ થી બનાવેલ ટ્યુટર વિભાગ તેમજ વોર્ડ સહિત આધુનિક સુવિધાઓ ઉપલબ્ધ છે.

અદ્યતન સુપર સ્પેશીયાલીટી હોસ્પીટલમાં ઉપલબ્ધ વિવિધ સુવિધાઓ :

કુલ ૧૫૦ કરોડના ખર્ચે પી.ડી.યુ. સિવિલ હોસ્પિટલના પ્રાંગણમાં જ નિર્માણ પામેલી અદ્યતન સુપર સ્પેશિયાલિસ્ટ હોસ્પિટલમાં કુલ આઠ જેટલા સુપર સ્પેશિયાલિસ્ટ વિભાગો છે, જેમાં પ્રથમ માળે નેફ્રોલોજી અને યુરોલોજી વિભાગ બીજા માળે કાર્ડિયોલોજી વિભાગ ત્રીજા માળે ન્યુરોલોજી વિભાગ ચોથા માળે બર્નસ અને પ્લાસ્ટિક સર્જરી તેમજ પીડિયાટ્રિશ્યન વિભાગ જયારે પાંચમા માળે ૪૨ જેટલા આઈ.સી.યુ., કેથલેબ તેમજ ઓપરેશન થિએટરની સુવિધા ઉપલબ્ધ છે. સંપૂર્ણ હોસ્પિટલમાં સેન્ટ્રલી એ.સી તેમજ ફાયર સેફ્ટીના ઇક્વીપમેન્ટસ અને આર.ઓ. પ્લાન્ટની અદ્યતન સુવિધા પણ છે.

સૌરાષ્ટ્રની સરકારી હોસ્પિટલમાં સૌપ્રથમ આધુનિક કેથલેબની સુવિધા :

સૌરાષ્ટ્રની સરકારી હોસ્પિટલ ખાતે સૌપ્રથમ વખત આધુનિક કેથલેબ કાર્યરત થઇ છે. જેમાં હ્રદય રોગોની જટિલ સારવાર જેવી કે, એન્જિયોગ્રાફી તેમજ એન્જિયોપ્લાસ્ટીની સુવિધા રાજકોટવાસીઓને શહેરમાં જ ઉપલબ્ધ બની છે.

વર્લ્ડ ક્લાસ મોડ્યુલર ઓપરેશન થિયેટર :  પી.ડી.યુ. મેડિકલ કોલેજ અને હોસ્પિટલના પ્રાંગણમાં નવનિર્મિત સુપર સ્પેશિયાલિટી હોસ્પિટલમાં આઠ વર્લ્ડ ક્લાસ મોડ્યુલર ઓપરેશન થિયેટર છે. જેમાં અત્યાધુનિક મશીનો દ્વારા જટિલ સારવાર ઉપલબ્ધ છે.

આધુનિક ડાયાલીસીસ સેન્ટર : કેન્દ્ર સરકાર તેમજ રાજ્ય સરકારના સંયુક્ત સહયોગથી નિર્માણ પામેલી આ સુપર સ્પેશીયાલીટી હોસ્પિટલમાં દર્દી માટે ૧૯ બેડનું અદ્યતન ડાયાલીસીસ સેન્ટર બનાવવામાં આવેલ છે. જેમાં દરરોજ ૩ શિફ્ટમાં આશરે ૫૦ થી વધુ દર્દીઓ સારવાર લઇ શકે છે.

અદ્યતન બર્નસ્ તેમજ પ્લાસ્ટીક સર્જરી વિભાગ : અંદાજે ૧૬૫૬૧ સ્ક્વેર મીટરની વિશાળ જગ્યામાં બનેલી સુપર સ્પેશિયાલિટી હોસ્પિટલમાં આધુનિક રિસર્ચ લેબ છે. જેમાં સ્કીનના સેમ્પલ લેવાની અદ્યતન મશીનરી ઉપલબ્ધ છે. ઉપરાંત ગંભીર રીતે દાઝેલાની સારવાર અને જટિલ પ્લાસ્ટિક સર્જરીની સુવિધા રાજકોટવાસીઓને ઘર આંગણે જ ઉપલબ્ધ બની છે.

ઈકો ફ્રેન્ડલી બિલ્ડીંગ : પી.એમ.એસ.એસ.વાય. અંતર્ગત નવનિર્મિત સુપર સ્પેશિયાલીટી હોસ્પિટલનું બિલ્ડીંગ ઇકો ફ્રેન્ડલી છે. જેમાં સોલાર સિસ્ટમથી વીજળી ઉત્પન્ન થઈ દર્દીને ગરમ પાણી મળે છે. વરસાદી પાણી એકઠું કરવાની વ્યવસ્થા છે, તેમજ વોટર અને સુએઝ ટ્રીટમેન્ટ પ્લાન્ટ છે, જેના લીધે ખરાબ પાણી પ્યુરીયાઇ થઇ અને ફ્લશિંગ તેમજ ગાર્ડનિંગમાં ફરીથી ઉપયોગમાં લઇ શકાશે. હોસ્પિટલના પ્રાંગણમાં ઓટોમેટીક સોલર સ્ટ્રીટ લાઈટ પણ છે. પ્રધાનમંત્રી આયુષ્યમાન યોજના માત્ર દેશની જ નહી વિશ્વની સૌથી મોટી યોજના છે, જેમાં ગરીબ પરિવારને વાર્ષિક રૂા.૫ લાખની સારવાર ખાનગી હોસ્પિટલમાં પ્રાપ્ત થાય છે. નાયબ મુખ્યમંત્રીશ્રી નીતિનભાઇ પટેલે જણાવ્યું હતું કે, ગુજરાતના ગતિશીલ અને મોભાના શહેર રાજકોટમાં કેન્દ્ર સરકારના સહયોગથી ૧૫૦ કરોડના ખર્ચે બનેલી સુપર સ્પેશ્યાલિટી હોસ્પિટલ તંદુરસ્ત અને સ્વસ્થ ગુજરાતનાં નિર્માણ માટે ખૂબ ઉપયોગી બની રહેશે.